Фестиваль саннарда
Быел конкуренция аеруча югары булды, чөнки бәйгегә республиканың барлык 45 муниципаль берәмлегеннән 1058 гариза килде һәм уртача алганда бер призлы урынга 22 проект дәгъва кылды. Гаризаларның гомуми саныннан 778 проект төп «Күрше» юнәлешендә тәкъдим ителсә, тагын 280 гариза яңа махсус «Күрше. Мирас» проектына килгән.
Экспертлар сайлавыннан соң, төп конкурста үзмәшгульләрдән — 12, юридик затлардан 45 инициатива җиңүче дип табылды. Төп юнәлешнең җиңүче командалары бөтен республика буенча 211 чара үткәрәчәк. Иң күп чаралар Казанда, Чаллыда, Әлмәт һәм Биектау районнарында планлаштырылган. Фестиваль шулай ук кечкенә торак пунктларга да барып җитәчәк, мәсәлән, Тукай районында чаралар сериясе берьюлы берничә авыл җирлегендә узачак.
Безне бу җәйдә нинди проектлар көтә?
Җиңүчеләр арасында төрле масштабтагы һәм форматтагы инициативалар бар. Сезонның иң озак дәвам итәчәк проекты — Римма Галләмованың «Прибрежные истории» эко-арт-тропасы, ул Чаллыда бөтен җәй буена 32 чара үткәрәчәк. Иң массалы проект исемен Кукмара районы мәдәният йорты яулаган, алар якынча 10 мең катнашучыны җыярга планлаштыра. Шулай ук Баулы районында «Нейрополет» инклюзив инициативасы да хупланды, анда үсеш үзенчәлекләре булган балалар һәм аларның әти-әниләре өчен җәйге нейро-клуб эшләячәк һәм шәһәр бәйрәмнәре узачак. Түбән Камадан «База» креатив индустрияләр үзәге командасы гади ишегалды территориясен рок-концертлар, тарихи реконструкцияләр, спорт ярышлары һәм керамика буенча мастер-класслар үткәрү өчен күпфункцияле киңлеккә әйләндерәчәк. Төп юнәлеш җиңүчеләре өчен 18 июньдә Казанда очрашу оештырылачак, анда аларга дипломнар тапшырачаклар һәм ярдәм күрсәтү турында килешүләр имзалаячаклар.
Халык тавыш бирүе: үз фаворитларыгызны сайлагыз
9-14 июнь көннәрендә ВКонтакте платформасында «Күрше» төп юнәлеше проектлары өчен халык тавыш бирүе бара. Тавыш бирүгә комиссия тарафыннан югары бәяләнгән, ләкин эксперт сайлавында җиңүче булмаган инициативалар кертелде. Тавыш бирү нәтиҗәләре буенча өстәмә рәвештә өч җиңүче билгеләнәчәк: берсе үзмәшгульләрдән, берсе юридик затлардан һәм берсе бюджет оешмаларыннан, алар шулай ук үз идеяләрен тормышка ашыру өчен ярдәм алачак.
Яңа махсус проект — «Күрше. Мирас»
2026 елның төп яңалыгы булып «Күрше. Мирас» юнәлешен эшләтеп җибәрү торды, ул шәһәр яки район өчен озак вакытлы нәтиҗәләр тудыручы инициативаларга исәпләнгән. Бу категориядәге гаризаларны креатив индустрияләрнең 12 өлкәсенең кураторлары бәяләде, һәм ахырда кино, ИТ, архитектура, гастрономия, дизайн, музыка, халык-сәнгать кәсепләре һәм башка юнәлешләрдә 17 проект ярдәм алды.
«Быел без беренче тапкыр «Күрше. Мирас» махсус проектын эшләтеп җибәрдек, һәм аңа карата кызыксыну безнең көтелгәннәрдән дә артып китте. Без территория өчен бары тик чаралар гына түгел, ә озак вакытлы нәтиҗәләр тудыручы проектларга зур сорау булуын күрдек. Шулай ук гадәти «Күршедә» гаризалар сыйфаты да сизелерлек үсте: катнашучылар проект идеяләрен, партнерлыкларны һәм район халкын җәлеп итүне тирәнрәк эшли башлады», — дип билгеләп үтте Татарстан шәһәрләрен үстерү институты директоры Наилә Нагуманова.
Бу юнәлешнең җиңүчеләре районнарның дизайн-кодларын, татар телендә документаль фильмнар, туристик маршрутлар, мобиль микро-музейлар һәм арт-объектлар булдырачак. 8 июньнән алып командалар үз инициативаларын кураторлар белән берлектә камилләштерә, ә 25 июньдә Казанда аларның проектларын яклау узачак.
Барлык проектларны гамәлгә ашыру 1 июльдә башланачак һәм 13 сентябрьгә кадәр дәвам итәчәк. Җиңүчеләрнең чараларының тулы расписаниесе белән һәм сезнең йортыгыз янында кызыклы вакыйгаларны leto.tatar проекты сайтында күзәтә аласыз.
Бәйгене оештыручылар булып Татарстан Республикасы Рәисе ярдәме белән Татарстан шәһәрләрен үстерү институты тора.
