19 июнь
Казан ипподромында старт
Бәйрәм программасы 19 июньдә Казан ипподромында башлана. 17:00 сәгатьтә биредә ат чабышлары старт алачак. Моннан тыш концерт программасы планлаштырылган, анда популяр татар башкаручылары: Илсөя Бәдретдинова, Раяз Фасыйхов, Әлфинә Әзһәмова, шулай ук Илгиз Шәйхразиев һәм Malsi Music дуэты катнашачак.
20 июнь
Мирный бистәсенең каенлыгы
Мирныйда төп бәйрәм чаралары 20 июньдә 9:00 сәгатьтә башлана. Бәйрәм мәйданында һөнәрчелек буенча мастер-класслар, уеннары һәм традицион ризыклары булган 11 чын милли утар ачылачак. Аларны Арча, Алексеевск, Буа, Биектау, Яшел Үзән, Зәй, Кукмара, Лаеш, Нурлат, Менделеевск һәм Балык Бистәсе районнары тәкъдим итәчәк. Бәйрәм милли мәдәниятнең төрле якларын ачып салучы алты күренештән торган күләмле театральләштерелгән пролог белән башланачак. Үзәк мәйданда 2000нән артык артист, шул исәптән эстрада йолдызлары Илсөя Бәдретдинова һәм Салават Фәтхетдинов чыгыш ясаячак.
Урман-парк өлешендә «Казан кунакчыллыгы» концерты, тарихи викториналар, конкурслар һәм киемнәр күргәзмәсе узачак. Монда беренче тапкыр татар милли киемнәренең әйдәп баручы дизайнерлары маркеты оештырылачак, анда һәркем турыдан-туры бәйрәмдә үзенә ачык төстәге аксессуар сайлап ала алачак. Яшь кунаклар өчен крио-тамаша, сабын куыклары, иҗади мастер-класслар һәм бүләкләр белән «Балалар Сабантуе» мәйданчыгы ачылачак.
Аккош күле янындагы урман-парк
20 июньдә 9:30 сәгатьтән Аккош күле янындагы урман-паркта Әлки, Апас, Югары Ослан, Кама Тамагы, Яңа Чишмә һәм Чистай районнарының алты авыл утары эшли башлаячак. Алар кунакларны татар авылының гореф-гадәтләре һәм көнкүреше белән таныштырачак. Төп мәйдандагы театральләштерелгән пролог Идел буе халыкларында — татарлар, мордвалар, чуашлар, марилар, удмуртлар һәм башкортларда Сабантуй бәйрәм итү үзенчәлекләре турында сөйләячәк. Шуннан соң төп сәхнәгә популяр артистлар: Ришат Төхвәтуллин, Гүзәл Уразова, Иркә, Марат Яруллин, Гөлназ Асаева һәм Марат Галимов чыгачак.
Дәрвишләр бистәсенең каенлыгы
Дәрвишләр бистәсендә 9:00 сәгатьтән үк кунакларны Балтач һәм Саба муниципаль районнары утарлары каршы ала башлаячак. Тантаналы ачылыш 10:00 сәгатьтә «Күршеләр» прологы белән башланачак, ул аермалыкларга карата хөрмәтнең уртак мәдәни киңлек тудыруы турында сөйли. Территориядә тематик мәйданчыклар җәеләчәк: заманча һәм халык уеннары белән «Халыклар бердәмлеге», сәнәгать үсеше турында музей экспозицияләре белән «Хезмәт батырлыгы», шулай ук яшьләр өчен күп форматлы «Яңа буын» зонасы. Кичнең төп музыкаль вакыйгасы булып Татарстан Республикасының халык артисты Фирдүс Тямаев чыгышы торачак, ә барлыгы сәхнәдә 300дән артык артист чыгыш ясаячак.
Спорт, уеннар һәм сый-хөрмәт
Һәр мәйданда традицион халык уеннары: капчык киеп йөгерү, капчык белән сугышу һәм колгага менү Сабантуйның аерылгысыз өлеше булачак. Милли көрәш ярышларында шәһәрнең иң яхшы батырларын ачыклаячаклар. Җиңүчеләрне кыйммәтле бүләкләр көтә, ә абсолют батыр төп бүләк — «Лада Гранта» автомобилен алачак. Барлык мәйданчыкларда да җәйге кафелар, сувенирлар, милли аш-су һәм халык һөнәрчелеге эшләнмәләре сатыла торган сәүдә нокталары эшләячәк.
Транспорт: мәйданчыкларга ничек барып җитәргә
Маршрутны алдан планлаштырырга һәм махсус схема буенча эшләүче җәмәгать транспортыннан файдаланырга киңәш итәбез:
Мирный бистәсенә 8:00 сәгатьтән «Җиңү проспекты» метро станциясе, «10 нчы микрорайон», «Филармониянең концерт залы» һәм «Глазунов ур.» тукталышларыннан махсус автобуслар йөриячәк. Шулай ук иң тиз ысул булып Казан-1 станциясеннән «Каенлык» тукталыш пунктына кадәр электричкада бару торачак — юлга нибары 11 минут вакыт китәчәк.
Аккош күленә кадәр «Ремплер торак массивы» тукталышы янындагы юл участогыннан (ориентир — Залесная урамындагы «Татнефть» АЗС) бушлай шаттллар оештырылачак. Бу ноктага кадәр көчәйтелгән режимда эшләүче 36 нчы, 72 нче һәм 46 нчы автобусларда барып җитеп була. Моннан тыш, Казан-2 станциясеннән «Аккош күле» станциясенә кадәр электричка йөриячәк.
Дәрвишләр бистәсенә Шнепп исемендәге Турбокомпрессорлар фәнни-тикшеренү институты, «МЕГА» сәүдә үзәге парковкаларыннан һәм «Халитов ур.» тукталыш пунктыннан бушлай автобус маршрутлары җибәреләчәк.
Шоферлар һәм кунаклар өчен мөһим мәгълүмат
Сабантуй үткәрү көннәрендә юл хәрәкәте схемасы вакытлыча үзгәрәчәк: 19 июньнән 20 июньнең 17:00 сәгатенә кадәр Урман шәһәрчегеннән (Лесной городок) Ферма шоссесына кадәрге юлда берьяклы хәрәкәт кертелә. «Урман шәһәрчеге» торак комплексында яшәүчеләрнең уңайлылыгы өчен Бертуган Батталовлар урамы буенча чыгу мөмкинлеге белән ике яклы хәрәкәт сакланачак.
Тикшерүне уңайлы һәм тиз үткәрү өчен оештыручылар кунаклардан зур күләмле әйберләрдән баш тартырга һәм һичшиксез баш киеме кияргә сорыйлар. Барлык бәйрәм мәйданчыкларында оператив хезмәтләрнең кизү тору нокталары һәм медицина пунктлары каралган.
